بنادق مهجتي معبا فشقها والغلا نيشان
ابطلق روحي في قلب القصيد وأنبض أبياته
أبذبح حزني من أقصى الشعور لأول الإخوان
وأسيل عمره وتشرب عيون العمر دمعاته
وحيد ولامعي الا اخوي بداخلي غفيان
ترفرف ضحكته وأطلق نعاسي لصبح ضحكاته
في بالي يرقد وأدري حزين وشارد وبردان
وانا انثر برده من فوق الخيال وجمر سجاته
ينام و اعقد بعين الأغاني جمرة التحنان
ينام وأعقد بعين البدايه كل نهاياته
يدور القلب تتفتت ضلوعه يطحنه حرمان
يجوع القلب يحضني في جوعي وآكل فتاته
وأطل من الألم احضن حياة الشارع الولهان
يلملم حسرتي ويكسر وجودي بشوق إضاءاته
تعبت تمليني طعون تصب من خنجر الخلان
تعبت استنزف عيوني دموع العين طعناته
ياخيي إقعد .. الدنيا رمت من تحتي النيران
وهذا العمر مايحمل بجوفي إلا انكساراته
ياخيَي ليه تغيب وليه تتركني وانا شفقان
.لقرم يقلب جبال الهموم بعزه إثباته
اعرفه لاوصل كنه صقر من صفوة الويلان
يكش جلد السما إن شافت مخاليبه وهداته
رجال تربط حزام القبيله وتنفلت شجعان
وأخويه يربط رجال القبيله .. حزام هقواته
كريمـ ماهو من يبني فعايل صيته الديوان
في صدره دلته .. وهيله ..وفناجيله وتمراته
اذا كان الكرم حمس الـ.(هلا).في مهجه الضيفان
اخويه من حمس قلبه لضيفه وصب فزعاته
وكم (تكفا) إنرمت بين البشر ممزوعه الوجدان
أخويه قبل لا ترمي عليه يقط نخواته
حزين السيف بكفوف الأوادم طافي ذبلان
.بعد مانام دم الي سقا فعله وومضاته
ياخيي إقعد وقعد خضوعي بداخل الشريان
.... تنام ولا بقى هم قطف من دمي غفواته
غريبه شلون يكسرك الغياب ويغلبك نسيان
ودفتر جيتك ياخي طوى من عمري صفحاته
يجيني مدري ولكن أعرفه لاوصل جيعان
قسم وان جاني لاانحرني لجوعه تحت خطواته
وصل زوله هذاك اللي وصل مايشبهه إنسان
هذاك اللي وصل شايل عذاب العمر وآهاته
وجيت الحين يااخيي بعد ماشالتك امتان
بعد ماودهم غسل الجسد عن كل نزواته
أبد لا ينغسل هذا الشهم مغسول بالفرسان
اخويه من غسل روح الجسد في طهر نياته
أيا دفان دخيل الله لا تدفنه أيا دفان
دخيلك خلني أدفن في بالي جمر بسماته
وأهف بسماته من هذا المكان لآخر الأحزان
وأنا أطحن موته في جوع الكلام واخبز اسكاته
انام شلون لاصار الأخو جايع وانا شبعان
أخوي اللي كسر قلبه لجوعي وجاع لحظاته
اخوي اللي يمزمزني معاليقه اذا عطشان
أخوي اللي ثنى عمره من اجل أطلع مسافاته
يدين القبر ضميني وسط حضن الأخو نعسان
أبرقد دام لي قلب دفن وياه نبضاته
أكيد انه وسط قبره سمع طق الخطاوي الآن
ألا ياليت انا المدفون وانا اسمع طق خطواته
